घे विसावा जरा

'लिहा ओळीवर कविता - भाग ८९' या उपक्रमातील माझा सहभाग

घे विसावा जरा

सूर्य माथ्यावरी तापलेली धरा
राबसी तू किती घे विसावा जरा

स्वप्न साकारण्या तू किती झुंजला
क्रंदने झेलूनी रंजला गांजला..
देव ना ऐकतो कापऱ्या त्या सुरा
राबसी तू किती घे विसावा जरा

चार दमड्या मिळाया तुझी धाव ही
सोसले तू घणाचे किती घाव ही
हाकसी या रथा बडवुनी तू उरा
राबसी तू किती घे विसावा जरा

आज कन्या तुझी सासुरा चालली
फेडण्या कर्ज तू कातडी सोलली
प्राक्तनी आटलेला सुखाचा झरा
राबसी तू किती घे विसावा जरा

---------- वैभव फाटक -----------