मराठी ब्लॉग विश्व

Saturday 21 May 2016

हास्य-गझल

दोस्त दोघे एक मी अन एक तू
सातवी नापास मी, बीटेक तू

माहिती आहे तुझ्याबद्दल तिला
काळजी घेऊन थोडी, फेक तू

घे जरा वाटून कामे आजही
मी चपाती लाटतो अन शेक तू

ती भले 'मिस वर्ल्ड' तुझ्यासाठी, तिला
वाटतो आहेस का अभिषेक तू ?

पाहिजे असतील जर श्रोते तुला
सूर सांभाळून थोडे रेक तू

वैभव फाटक ( २१-०५-२०१६)

Tuesday 17 May 2016

पुन्हा तू भेटण्याचा वार ठरलेला

पुन्हा तू भेटण्याचा वार ठरलेला
पुन्हा हृदयात हाहाकार ठरलेला

करावी तू स्तुती माझी, तुझी मीही
तुझ्यामाझ्यात हा  व्यवहार ठरलेला

किती साच्यात आयुष्यास ओतावे
तरी घेईच ते आकार ठरलेला

निघाला दूर लाचारी कराया तो
बिचारा एकटा लाचार ठरलेला

दिसू शकणार नाही सर्व डोळ्यांनी 
दिव्याखाली सुधा अंधार ठरलेला 

कितीवेळा पुढे मी ठेवले पेढे
विसरला देव भ्रष्टाचार ठरलेला 

वैभव फाटक (१६-०५-२०१६)