साद वेडी

तुझ्या पावलांचा जिथे स्पर्श व्हावा
तिथे मी फुलांचा सडा अंथरावा
तुझ्या चाहुलींनी असा मुग्ध होतो
जसा जीव वेडा कुणी मंतरावा

तुझ्या पैंजणांचा जरा नाद व्हावा
उरातुन सुखाचा झरा पाझरावा
तुझे हासणे गोड गाली पहावे
सुखाने जिवाचा दिवा मालवावा

तुझा भास होतो परी साथ नाही
तुझ्या दर्शना मी दिवास्वप्न पाही
उरातील वादळ कसे हे शमावे
मनी बावऱ्या चैन नाही जराही

जिथे वाट नेते तिथे चालतो मी
उरी आठवांचे सडे झेलतो मी
तुझी भेट होणे अता शक्य नाही
तरी साद वेडी तुला घालतो मी

वैभव फाटक ( ०५-०७-२०१२)